बुलडाणा – 29 मार्च बुलढाणा जिल्ह्यात सिंदखेड राजा आणि लोणार तालुक्यातील अनेक भागात आज 29 मार्चला सायंकाळी 5 ते 6 वाजेच्या दरम्यान जोरदार अवकाळी पावसाचे आगमन झाले. यावेळी वादळी वाऱ्यामुळे सिंदखेडराजा तालुक्यातील सवदड या गावात एकच हाहाकार माजला होता. शंभरहून अधिक घरावरील टीन पत्रे उडाली तर दोन बकऱ्यांचा मृत्यू व 1 महिला जखमी झाल्याची माहिती समोर आली आहे. या वादळी वाऱ्यामुळे लव्हाळा ते साखरखेर्डा मार्गावर अनेक झाडे उन्मळून पडली होती त्यामुळे 2 ते 3 तास या मार्गावरील वाहतूक ठप्प झाली होती. घटनेची माहिती मिळताच आ. डॉ. राजेंद्र शिंगणे यांनी परिस्थिती जाणून घेतली व प्रशासनाला कामाला लावले. माहिती मिळताच साखरखेर्डाचे ठाणेदार स्वप्निल नाईक यांनी पुढाकार घेत रस्त्यावर पडलेली झाडे हटवली. वादळी वाऱ्यामुळे अनेक विद्युत खांब कोसळल्याने अनेक गावातील विद्युत पुरवठा खंडित झालेला आहे.
बुलडाणा जिल्ह्यातील “या” गावात आसमानी कहर, शंभरहून अधिक घरांची टीन पत्रे उडाली,2 बकऱ्यांचा मृत्यू तर 1 महिला जखमी
